腦腫推介·叱咤N大 -繁星外的饌玉 EP1-
The Common Room | 牛津留學回憶玩味習作
（專題名及筆名來由：
諗嘢太多 成日頭痛 個腦腫咗 腦腫是也
「焚香列鼎奉腦腫，饌玉炊金飽即妨」
明．湯顯祖《牡丹亭．勸農》（改ed））
除咗以星級、排名分類之外，其實仲有好多「食回憶」嘅好餐廳，除咗食物有質素外，呢啲餐廳都係有個性，代表到餐廳主人自己嘅故事。絕對係「走心」嘅傳記式博物館。
一連N集，密切留意！
今日第一集，為大家介紹呢間離地鐵站同Instagram Pier都只有五分鐘路程，位於One Eight One酒店及服務式住宅3樓嘅The Common Room，體驗吓餐廳主人- 廖創興企業(00194)後人-廖坤城先生Christopher，喺英國牛津留學時嘅迷戀同興趣，仲有佢最喜愛嘅英式同常去嘅米蘭餐館嘅意大利美食。
偏甜口嘅Décocream Balsamic濃醋，同清香嘅Losito初榨橄欖油，都係Christopher由一家位於意大利米蘭嘅海鮮及意大利麵餐館Trattoria del Pescatore帶返嚟，等大家都可以試到佢鐘意嘅柔和口味。亦從中感受到Christopher溫婉嘅個性。
（餐桌禮小知識：食到成檯麵包碎就啱數：意大利人會覺得咁樣先係欣賞緊個麵包㗎。」）
今日選菜主要海鮮為主調，餐廳為我哋選擇咗帶柑橘香，配以中性圓融酒體嘅意大利La Tunella 2018 Friulano白酒相配。
喺等待用餐之時，曾任The Landmark Mandarin Oriental嘅酒店銷售及市場部總監Catherine同市場部經理Karen，為我哋娓娓道來One Eight One酒店同Christopher嘅故事。不過佢哋講之餘，我哋都有四圍望到餐廳佈置咗好多同英國有關嘅畫作，擺設。Karen話呢啲都係Christopher嘅回憶。有過癮嘅，有帶文化氣息嘅，有玩樂無窮嘅。相信都代表咗佢唔同嘅性格特質，我哋先嚟個圖片說故事，睇吓下面嘅擺設會唔會勾起某啲都喺英國讀大學嘅朋友，一啲青年時期嘅Common Room回憶。
最令我震撼嘅係一部桌上足球機旁牆上，掛住嘅兩幅珍藏，聽聞係Christopher朋友送俾佢，裡面兩件球衣唔係錢可以買到返嚟，球王比利同馬勒當拿，佢對足球嘅熱愛，不言而喻。
腦腫推介菜式：
Scotch Eggs (4 halves) $180，係我最愛嘅英式菜之一。佢用手工腸肉包喺溏心蛋外面，再將外皮炸到脆一脆，好過份嘅頭盤，我超滿足！
Hokkaido Scallop Carpacco with Ikura-Yuzu Dressing $260；聽聞個三文魚籽柚子汁係同Trattoria del Pescatore餐廳一樣做法。你睇粒帶子大隻飽滿到呢，爽彈呢啲字眼真係唔夠影容，喺個口度加埋啲汁係滑入食道，差啲直落直腸，你話佢滑唔滑？（唔好意思，誇咗啲）
Red Prawns Spaghetti $500 紅蝦意粉嘅汁就鮮味十足，份量絕對係Share Portion。意粉當然無Bombana或Angelo啲咁Al dente，呢個只係個人喜好問題。其實唔係Al dente先啱數。傳統口味同文化嘅差異，再加上太多人講Al dente呢個字，影響咗我哋要跟大隊。千其唔好因爲其他人話好就覺得好，每個人嘅口味係同自己嘅經歷、成長，仲有基因或者天氣有關（天氣都關事？係呀，心情都關事）。我係鍾意唔煮咁耐嘅；熟啲嘅就比較適合多數香港人口味咁囉，隨喜好叫餐廳加減煮嘅時間就ok！無咩邊個啱，邊個錯。
Slow Cooked USDA Beef Short Ribs (for 2-4 sharing)$800
呢個Short Ribs 其實唔Short，件頭大，切落嚟都有廿幾塊。佢肉質好嘅，新鮮嘅，其實可以再Raw啲仲好，但咁嘅熟度都非常嫩，大家「些牙」首選。
飯後我哋就要上房休息吓，影吓相。
想睇我哋嘅住宿體驗？請按下面網址：
依家喺The Common Room用美國運通Centurion, Platinum卡埋單，有最高半價優惠！
詳情請參考網址：
One Eight One酒店係廖創興創立之地，某程度上係廖創興對西環嘅一種回饋。呢個價錢食到有質素又份量十足嘅意大利菜，呢度絕對係好選擇，依家仲有免費泊車服務，方便到大家！
The Common Room
3/F,One-Eight-One Hotel & Serviced Residences,181 Connaught Road West Hong Kong